« Tot à fait d’zos l’viatje, vraimint o fond, lâvâ

On veut on p’tit clotchî : c’est l’tchapelle d’Herlinvâ

C’e-st en saze cent vingt-sept qui elle a stî bâteye.

Sieure Jean d’Herlenval av’avou one bonne idèie

Do l’fé bâti o pré ; C’è-stéf one belle offrande.

Elle a stî consacrèîe l’annèie saze cent et trente,

Li sept juin, paraît-i. Ca stî on révérend

Théodore de Grâce, di Lîtje, qu’è-stéf suffragant,

Qu’a fait l’cérémonie. Puis il a co falou

Tchûzi on saint Patron. Do côp on-z-a trouvou

Qui l’tchapelle sèrè dédièie à St Hubert.

En dix-sept cent quatre vingt cinq c’est Djacques Lambert,

Curé, quo l’av’. En dix-hût cent vingt nouf i-n-n-a

Fait don, dins s’testamint, às-z-ès djins d’Herlinvâ.

Elle est fwart bin mètoye : des grands âbes tot âtoû,

Comme po l’mètte à l’abri, des grandès airs, surtout.

Gn’a pon d’mohons tot près, ni po d’vant, ni poudrî.

Rin qui ginne ou qu’ol catche-tote seule elle paraît mî.

Qu’i fait bon avâ-là ! C’è-st on lieu poétique,

Avou l’fontinne addé, qu’a quétchôse di rustique.

Elle est co bin d’aplomb mâgré qu’elle est fwart vèye.

Commint-‘c’ qu’elle ni croule nin après tant d’annèies ?

Les mours sont co bin dreuts ‘et d’one belle sipècheur :

Qâzï on mète di lâdje-on n’fait pus ça asteur !

Su-l’crèstaî do teut, les chayes les chayes y sont-elles co totes ?

Probâb’mint qu’i-n-gn’è-n one ou l’ôte qui claqote.

Les fignièsses, totes pètites, ont co tos les carreaux…

Quéq’fèye, on vèrre findou qu’arè avou on côp

D’one pîre qui des gamins, en djouwant, ont lancé ;

On s’dimande commint-‘c qu’i gn’a rin d’pus di spiyé ?

Et l’grosse uche di bwès qu’est d’vant, do costè dol voye,

Mâgré brâmin des ans, n’est nin co vièrmoloye ;

Moutwè bin qu’les vièrtîres sont on pô arigntèyes !

 

Intrans è nosse tchapelle. Tot-â coron d’lallèye

I-n gn’a l’âte, fwart hôt-i va jusqu’à plafond ;

Schix belles colonnes twardoyes boss’lèyes en tire-bouchon.

Et à costè, i-n gn’a des ôtes pètits kayèts

Qui sièrvèt d’garniture, dorés èt qui r’luyet.

(Cwant’curés’e’-qu’y sont v’nou, d’jà là, dire one basse messe ?)

I-n gn’a des statuettes anciennes, qu’on veut o d’zos :

Saint Hubert, li patron ; èt po d’zeus on veut co

Saint Djoseph èt, tot près, o-n ôte saint compagnon ;

A mîtan, one sainte Vierge qu’a bîn l’air d’avu bon.

L’long des mours, n-gn’a d’zotes saints : one ste Anne qu’è-st assîte,

Belle, mais rakrafougnèye, èt qui paraît bin p’tite.

O clotchî, one petite clotche qu’a on fwart bai son ;

Elle chiytèye clér èt nèt ; qâyï comme on rudion.

On z-a bon quand on z-ô li dign’-dign dol sonn’rèye,Comme quand on choûte tchanter les klouktraîs, al vèsprèie.

André do marchâ a bin stî côps sonner

Po ktchèsser les wallèyes quand l’tonneur av’toumé.

--------

Souv’nir do timps passé ! aimans nosse vèye tchapelle,

D’oû-‘c’ qui les anciens v’nint prier. Elle nos rappelle

Nos vîs grands parints qu’y v’nint fé leus dévotions.

Riv’nans-y co voultî l’mardi des rogations ».

Odon Fabry.

 

*******